;
Breaking
Sabbin alkawuran da shugaban Najeriya ya dauka

Sabbin alkawuran da shugaban Najeriya ya dauka

Shugaba Muhammaud Buhari ya zayyana wasu abubuwa guda tara da ya ce zai mayar da hankali cikin shekaru ukun da suka rage masa domin inganta rayuwar 'yan Najeriya.

A wata sanarwa da mai magana da yawunsa, Femi Adeshina ya wallafa a shafinsa na Facebook, Shugaba Buhari ya bayyana hakan ne a lokacin da yake karbar sabbin jakadun wasu kasashe zuwa Najeriya.

Shugaba Buhari ya shaida wa jakadun cewa "a kokarinmu na ganin mun inganta tsare-tsarenmu na cikin gida da waje da kuma samar da ci gaba a Najeriya mun fahimci dole ne mu aiwatar da wasu abubuwa guda tara da ya kamata mu bai wa fifiko a 'yan shekarun da suka rage mana."

Abubuwa tara da Buhari ya alkawarta

  • Gina tattalin arziki mai dorewa
  • Bai wa jama'a dama da yaye talauci
  • Inganta sha'anin noma domin samar da abinci har ma a rinka fitar da shi
  • Samar da wutar lantarki tsayayya
  • Samar da ingantaccen sufuri
  • Inganta sana'o'i da masana'antu
  • Samar da ilimi mai nagarta
  • Samar da ingantacciyar lafiya ga 'yan kasa a farashi mai rahusa
  • Fito da hanyoyin yaki da rashawa da cin hanci da kuma inganta harkar tsaro

To sai dai shugaba Buhari ya bayyana cewa abubuwan guda tara da ya lissafa suna kunshe a cikin "Kundin habaka tattalin arziki da dawo da martabarsa na Najeriya" da gwamnatinsa ta fito da shi domin inganta rayuwar 'yan kasar.