Batun Tsige Trump Ya Fara Daukar Zafi


Wasu muhimman mutane a shari’ar tsige shugaban Amurka Donald Trump da masu kare shi, sun yi musayar yawu mai zafi a jiya Lahadi a kan yunkurin da ya yi na tursasa Ukraine ta gudanar da binciken da zai taimaka masa a siyasance da ya kai ga tsige shi daga ofishi.
An dai bude shari’ar da ake yiwa Trump a Majalisar Dattawa a hukumance ne a karshen makon jiya yayin da za a fara gabatar da hujjojin yanke hukunci a gobe Talata.

Amma masu cacar baki ta fannin siyasa da doka a kan makomar Trump a wannnan batu, sun yi musayar yawu a kafafen yada labarai da safiyar jiya Lahadi a fadin Amurka, lamarin dake nuna irin dambarwar da Amurkawa za su gani a Majalisar Dattawa.

Wani lauyan kare masu laifi, kuma daya a cikin rukunin lauyoyi masu kare Trump Alan Dershgowitz ya fadawa shirin CNN na State of the Union cewa zai fadawa ‘yan Majalisar Dattawa guda dari da zasu yi shari’a a kan makomar Trump cewa, koda bayanan da aka gabatar musu gaskiya ne, laifin bai kai a tsige shi daga ofis ba.

‘Yan Majalisar dai sune za su yanke hukunci a kan ko Trump ya aikata manya ko kananan laifuka da suka sabawa tsarin kudin mulkin Amurka da zai kai ga tsige shugaban kasa.



Comments


Post Your Comment



Local News

Foreign News


© 2020 Copyright: visionfm.ng